C.Lalrochhara ,Matthaia Group
Vawiin Easter Sunday hi a khawhar thlak viau naa, lehlam zawnga ngaihtuah chuan Easter hlu tak niin ka hre bawk.
Khaw vawt kan mangtha hun, nipui a lo thawt chhoh hun, Sakhaw lama kan hun pawimawh a ni a, ram vawt taka chengte tan phei chuan hun hlimawm a inher lai a ni. Khawvel ram tam takah he hun (World Temperature Zone) hi pangpar vul țan, thinghnah leh hnim hring chawr no hun a ni a.
Kan Branch Secretary Pu Mama faten Easter puala Artui an chei te an status lamah ka hmu a, emgngemaw ti takin ka lung a ti leng riau. Artui hrim hrim hi Chawimawina leh lawmna atan Easter puala hmanraw pawimawh tak a tan an hman a nih zia te ka ngaihtuah a.
Khawvel hmun tam takah Easter pual hian thilthlum ațanga siam Jelly beans, marshmallow bunnies, peeps, Chocolate Easter Eggs leh thil thlum (confectionary) lam aṭanga siam chi hrang hrang te a bikin an buatsaih a. Pangpar pakhat thlan aṭanga Lal Isua thawhlehna entirna atan Easter Lily (White Lily) chu Biak In mai ni lo, mahni in leh kawt lai lun laiah te uar takin an khawi ṭhin.
"Easter' (Eastre) hi Anglo-Saxon țawng a ni a; an pathiannu (goddess) 'Eng' (light) sawina na ni awm e. Grik pathiannu ni eng lum nuam tak petu Eostor (Easter) nia sawi a ni bawk.
Easter hma chiah hi Holy Satarday an vuah a, Inrinni zan inkhawm pawh Easter Vigil an ti kher țhin. Hemi hunah chaun uar takin Krismas leh Kumthara kan tihdan phung angin Easter Card hmangin duhsakna nasa takin an inthawn țhin.
Pacific thliarkara Easter Island te pawh khu Dutch Admiral Jakob Roggeveen-a'n kum 1722-a Easter Sunday ni taka a hmuh chhuah a nih avanga Easter Island tih hmin lo pu ta tihte hi kan hre vek tho naa, a thunawn ang deuhin ka'n sawi nawn ve hrim hrim a ni.
Kristian Missionsry-te chuan Europe hmar lam ramah kum zabi pahnihna AD khan Chanchin Țha an hril a. Chutah chuan Teutonic-ten nipui hun an lawm țhin nen Isua khenbeh thu hril chu a in nang a. He nipui hun an lawmnaah hian Isua Krista thihna hneha a thawhleh thu an lo tlangaupui ta a. Chumi hnu zelah Isua a thi a, a thawhlehna hming atan 'Easter' an hmang zui ta niin an sawi.
Good Friday leh Easter hi Krismas angin a ni mumal taka bithliah a ni lo va, Hebrai Calender (Nisan) ni 14-naah an hmang țhin. A ni bikah Thawhțan, Thawhleh ni bakah Nilainia hmang an awm a. AD 326-a World Council of Churches, Nicaea khawmpuia Kohhran hruaitu 318 kal khawmin a rel angin Easter chu Pathianniah hman ni se a tih angin tun thlengin hman a ni ta zel a ni.
Aleppo, Syria-ah kum 1997 khan World Council of Churches in khawm chuan Easter chu Krismas ang bawkin ni bik ruat rel mahse thutlukna erawh siam a ni lo. Khawvel puma chhun leh zan a inchen (Vernal equinok) lai, ni 22 March - April 25 inkar (thla bial zan) Pathianni hmasa berah hman a ni tlangpui.
Hunkhirh leh harsa tak kan tawn mek avangin kum danga urhsun taka kan hman ṭhin, Kristiante hunpui Easter meuh Kohhranin a huhovin Biak In lamah hmang thei lo mah ila, Chhungkuaa uluk taka hun kan hmang tam ta sawt avang hian lawmna tur kan hmu niin ka hria.
👍👍👍
ReplyDelete