KHAWNGAIHNA

                                         Ahluna Chhakchhuak
A tawngbul lam (Greek) a " _Kharis_ " tih hian mawi leh duhawma lang, min hip em em mai thil sawina a kawk ber a, thilthlawnpek, phu loh hlir, a thlawn liau liauva inpek hi a kawk tel bawk. A Hebrai tawng ah chuan _"Khen"_  tih ani a, voh, duhsak, mit tlung tih te a kawk tel ve thung. Genesis 6:8 a "Nova erawh chuan Lalpa mit a tlung a, tih te pawh kha" Pathian khawngaihna a chang a", tih nen thuhmun a ngaih ani. Chuvangin Thuthlung hlui lamah pawh Khawngaihna hi Israel fate a hruai dan ah te Sam ziak ah te leh lehkhabu dang dang ah te hmuh tur a lo awm nual tawh a. Thuthlung tharah chiah khawngaihna a awm anga sawi hi a dik hlel deuh maithei.

PAULAN ENGTINNGE A SAWI?

Paula hian a lehkhathawn reng reng ah khawngaihna hi a dah chungnung hle a. A thuhril laimu ah mi tamtak in an ngai. "A thisen avangin amahah chuan kan tlanna kan nei ani-a khawngaihna ngahzia ang zela kan bawhchhitnate ngaihdamna chu"
(Ephesi 1:7), Khawngaihna tinreng (II Kor. 9:8) tih te, 'a khawngaihna ngah nasatzia' (Eph. 2:8) tih te leh Pathian khawngaihna nasa em em (II Kor. 9:14) a tih te hi Khawngaihna thuk tak mihring in a a hriatthiam phakloh a sawina ah mithiamte chuan an ngai a. Hman ral sen loh tur khawpa tam leh tlin loh nei lo sawina ani ber. James Moffat-a chuan, "Paula sakhua leh a rinna laimu chu tawi tein, 'A vaiin khawngaihna vek, a vai atan khawngaihna hlir' tiin a khaikhawm theih," alo ti hial ani. Kan thlarau mi hmasa Pu chawngkhupa te khan anlo chiang hle mai. Khawvel lam tehna a fing lo leh mi a ang hiala an ngaih khan tharau thianghlim puihna an hmu fiah tak tak chu,

 ```_Aw khawngaihtu Pathianin
Kan thinlung chhungah hian,
Thlarau min pek lawmna hi
Khawvel finin a zolo e

Aw kei misual bo hnu hi
A khawngaihna zarah
Thlarau min pek nunna hi
Aw ka nunna Lalpa fak rawh_```

an lo ti ve bawk a. Ringtu nun tak tak khaikhawm tu chu khawngaihna hi ani mai awm e. Khawngaihna a chhandam, khawngaihna avanga rawngbawl, khawngaihna avanga nung, khawngaihna avanga van kai tur kan nih zia a chiang hle mai.

MAHSE...

Chuti taka Pathian thilthlawnpek ropui tak chu anilo zawnga laksual theih niin a lang.

Rom 6: 20 ....Sual a punna apiangah khawngaihna chu a pung lehzual thin.

Paula hian Pathian khawngaihna ropui zia a hrechiang hle a. Chu Khawngaihna ropui zia ti langtu chu SUAL HNEHNA hi ani. Khawngaihna hian sual kan nihna ata min chhandam ringawt lova sual hneh thei turin min pui ani. Kan hneh sual a a nasat poh leh a hnehtu khawngaihna ropuizia a lang dawn a. Pathian khawngaihna chu chutiang sual nasa tak chunga leng thei, hnehtu chu ani.

TAH HIAN A TAWP MAI LO...

Rom 5:20 a a lehkhathawn hi a hunlai ami te khan "Sualin awm reng ila, min khawngaih reng mai dawn ani" tih zawngin anlo la sual ani maithei.

Chuvangin a bung dawt chiah Rom 6 ah Paula hian a rawn sawifiah ta a.

Rom 6:1-2 Engnge kan sawi tak ang le? Khawngaihna chu a pun lehzual theih nan sualin kan awm reng dawn em ni? Hnai lo ve. Keini sual kawnga thi tawh sualin engtin nge kan la nun theih cheu vang?

He laia .... sualin kan awm reng dawn em ni.. tih hi "sual nunphung a neih" tihna ani." Chumi awmzia ni a lang chu kan pianthar hnu hian, Krista a nun thar kan neih hnu hian, thil sual a tih leh theih tawhloh tihna lam niloin sual chu nunphung ah kan nei thiang tawhlo, kan nei thei tawhlo tihna zawk ani. John Stott-a chuan 'Isua chu kan sualna mawhphurin a thi a, keinin a thihna chu kan aiawha thi ah kan pawm ta a. A thihnaah chuan sual lam kawngah kan thi ve ta ani. Sualin min tibuai thei ta lo kan tih hian sual a bo pil ta a, a awm ta lo tihna ni lovin, sual tur leh a thiltihtheihna khan min tibuai tawhlo tihna ani a lo ti a. He hrilhfiahna hi Paula sawi nen pawh a inmil hle.

Mihring chaklo tak kan nih avangin Kan pianthar hnu hian thil sual hi kan ti leh palh thei ngei mai mahse hre reng chunga sual nunphung a neih luih tlatna hian Pathian khawngaihna chu engmahlo ah a chantir a. khawngaihna hi sual tih pun lunna niloin sual hneh thei tura min puitu pawimawh tak ani zawk.