Rev.Vanlalbela
Lal Isua an man dawn zana Getsimani huana a tawngtai khan, a zirtirte hnenah, “ Ka rilru a lungngai em em a, thihna khawp hial a ni, mi venpui rawh u,” tiin venpui turin a zirtirte a sawm a; Isua hian venpui a ngai a ni.
Lal Isua hi engtin nge kan venpui ang le? Isuan, “Mi venpui rawh u,” a tih kha eng a tihna nge ni ang? A zirtirte khan amah kha lo veng a, a mantu turte laka lo hum turin a duh em ni ang? Han ti dawn ila, Petera’n khandaih hmanga tan a lo khawh kha Lal Isuan a khak a, amah chhantu tur chu duhse a ngah zia hrilhin, “ Tunah pawh vantirhkoh sangruk hmun sawm leh hmun hnih aia tam zawk mi rawn tirhsak turin ka Pa hnenah ngen thei lovin mi ring em ni le?” (Mtt 26:52,53) tiin, a beng a sahthlak sak Malka beng pawh a tih dam sak a. “tan lo khawh ve rawh u,” a tihna chu a ni lo a ni ang. Thiam thu lo sawipui turin a bei sei em ni ang? han ti dawn ila, amah ngei pawhin a thiam thu a sawi duh lo va, insawifel tumin vawikhat mah tan a khawh si loh avangin, sawifelpui chu a phut lo vang. “Ka tuar ang hian tuar ve rawh u,” a ti a ni ange, han ti dawn ila, amah an man lai khan, amah man tura lo kalte hnenah khan, “Nangnin kei mi zawng in nih chuang hengho hi thlah tha rawh u,” (Jn 18:8)tiin a dilsak bawk si a. Lal Isuan “Mi venpui rawh u,” a tih hi eng a tihna nge ni ang le? Lal Isuan venpui sela a duh tak ber ni awma lang chu, a tih tur, Pain a pek chu a tih ngei theih nan, “Daltuah lo tang suh u,” a ti a ni ang.
Tunah hian engtin nge Lal Isua hi kan venpui ve tak ang le? Lal Isuan a duh apiang a tih theihna tura daltu lo nih loh hi keini pawhin kan venpui theih dan chu a ni ang. Mahni nun theuhvah hian Lalpan a duh apiang tih kan phal hi amah kan venpuina a ni ang. Kan sual ngaihdam a duh a, sual ka nei em ni? ti a zawt khawtlai lovin, (Tumah ngaihdam tur nei lo khawpa misual kan awm loh avangin, (1Jn 1:8- 10)) Lalpa, misual ka ni, tiin ngaihdam dil hreh lo ila. Lalpan kan hnena awm a duh a, kan nuna amah lo dal thei apiang hnawl ngam ila; m’..idangte chhandam a duh avangin hmanrua tur a duh a, “Lalpa, heta hi ka awm e, mi tir ta che,” tiin inpeih at bawk ila. Keimahni theuhvah leh mitin hneah Lalpan a duh duh a tih hi phal takzet ila, chu chu Lalpa kan venpui theih dan kawng chu a ni mai lawm ni?
This comment has been removed by the author.
ReplyDelete