RAWNGBAWLNA- HMANGAIHNA NEN

 

RAWNGBAWLNA- HMANGAIHNA NEN

Chhiar tur: Johana 15:1-12   

                            Pu PD Vanlalzawna

 Leader,

KṬP Leitan South Branch

Kan Bible chang târ lanin sawi a tum ber nia lang chu -Lal Isua ringtute chuan a thu kan awih ang a, amah nen kan inzawm tlat ang a,a zirtirnate leh a thupekte pawh kan zâwm ang a, amah zâwm lo, a thu zâwm lo leh a duh anga awm lote chu an la boral dawn tih ani a, mahse han chhiar chian chuan a pawimawh lai tak mai,kan hmuh hmaih fo chu hmangaihna thu bawk hi a ni.Bible-a Lal Isua chanchin kan chhiar chuan, a zirtirna \ha tak tak, tam tak hmuh tur a awma, mahse a thupek tak hi chu a tam lo hle mai. Helai changah hian chiang takin kan hmu a,“Hei hi ka thupek a ni, keiin ka hmangaih che u ang bawkin nangni inhmangaih ula.” tih kan hmu a, Lal Isua thupek anih avang hian inhmangaih tawnna hi amah kan rinc hhung chuan kan dah pawimawh hmasak reng hi thil pawimawh tak a ni.

 Hmangaihna han tih hian hriat thiam mai hi a harsa \hin a, thûk deuh ruiha ngaihna pawh a awm thei a. Mi pangngai, rinna lama thuk vak lote tan chuan hmangaihna nun han tih hi kan neih ve theih loh tur leh mi hlim sâng deuh te, Pathian pawl hnem leh Thlarau Thianghlima khat te neih theih chauh tura ngaih hi a awl viau mai. Mahse hmangaihna awmzia chu eng nge ni ta ang? Mi dangte tana inpekna, induhsakna leh mi dangte tana chênpui nuam,khawsakpui nuam, thawhpui nuam leh rawngbawlpui nuam,mite tana harsatna siamtu ni lova malsawmna thlentu tih bakin han sawi fiah vak dan a awm chuang awm lo ve.Chumi a nih avang chuan Hmangaihna hi mi zawng zawngin kan tum chuan harsa lêm lova kan neih theih vek a lo ni reng mai.Hmangaihna nen kuminah hian kan hma zawna kan rawngbawlna tur \heuhah te hian rawng han bawl thei ila,keimahniin nuam kan ti anga, a rawng kan bawlsak kan Lalpa Isua hi a va lawm dawnem! I Petera 5:8 “Ngaihven ula,fimkhur rawh u; in khingpui Diabola chu sakeibaknei rûm Thin angin a ei theih tur zawngin a phi ruai \hin,” tih kan hmuh angin kan hmelma Setana hian kawng hrangin hrangin amah ringtu nghet tawh nia inhriate pawh hi min tihtluk tumin \an a la reng ani tih hi hria ila, Pathian a ropui dawn apiang hian Setana hi a rawn lang ve nghal zat zel a, a thiamna chi hrang hrang hmang hian rawngbawltuteah pawh hian ram lak a lo tum ve ngar ngar reng a ni tih hi kan hriat nawn fo a \ha hle mai. Rilru thianghlim tak pu chung leh lawm chunga Lalpa rawngbawlte hi chu Setana hian a hneh thei ngai lo tih hi keini ringtute chuan hre nawn fo \hin ang u. 

Rawngbawl hona peng hrang hrangah hian ‘kei chu ka ti tam bik’, ‘ka thawk chhuak ngun bik’, ‘mi dang hi an thawk tlem bik’ tih te, ‘chu mi chu ka ei lo’, ‘chumi chuan chuti chuan min ti, ani pawh eng nge a nih bik’, ‘ani aiin ka tihdan a dik zawk’ han tih maite a awl viau \hin. Mahni dik leh thiam zawk tlata inhriatna te hi a lian duh hle mai.Thufingte 21:2 “Mi tin awm danhi mahni mitah chuan a dik tiha ni a. Nimahsela, Lalpan thinlung a bûk thin,” tih kan hmu a, chu vang chuan inngaihtlawmna nun leh tlawm zawk nih pawh inhuama rawngbawl hi kan Pathian duh dan chu a ni.Amaherawhchu, mihring kan nih chhung hi chuan tlawm zawk nih te har kan ti \hin a,ropui zawk leh dik zawk nih hi kan duh dan chu a ni fo mai.Lal Isua zirtirte ngei pawh khan ropui zawk nih kha an inchuh ve a nih hmel viau. Luka9:46-48 “Tin, “Kan zingah tu nge ropui ber ang?” tiin an lo inhniala. Tichuan Isuan an rilrua an ngaihtuah chu a hria a, naupang tê a kai a, a sirah a dintir a, an hnenah, “Tu pawh ka hming avanga he naupang tê hi lawm apiang chu keimah mi lawm an ni ang; tu pawh kei mi lawm apiang chu mi tirtu lawm an niang; in zavai zinga tê ber hi a ni,ropui ni,” a ti a tih kan hmu a,helai thuah hian kan hmu chiang viau mai, Lal Isua chuan rilru inngaitlawm, mi dawh theite hi ropui ber a ti tlat a ni.Kan rawngbawl honaah hian eng emaw harsatna kan tawk anih chuan Setana a inrawlh a nitih hi hriat tum zel mai ila, Setana aiin Lal Isua zawk han dah lian

zel mai ila, thil chu a lo fel zel mai a ni.Keini ringtute pawh hi Pathian hnenah inhlan thar fo ila, Lal Isua hi kan nun hruaitu atan hmang zel turin kan insawm leh a, kumin kan rawngbawl chhohna tur kawng hrang hrangah pawh hian puitlin lam kan pan zel a, rilru thianghlim tak pu a, lawm chung leh mi dangte tana malsawmna ni thei tura hmangaihna nen rawng kan bawl zêl theih nan Lalpa’n malsawm rawh se. AMEN!