Chhiar tur: Rom 6: 6-7 ~
Pi Lalluii
Asst Secretary,
Kohhran Hmeichhia
Pathian chhandamna tih thupui hi thupui lar leh sawi hlawh pawl tak a
ni. Pathianin mi zawng zawng min chhandam , chhandam tawh chhandam mek, chhandam
tur kan ni. Pathian chhandamna thu pawh hi sawi nawn fo leh hrilh nawn fo kan
ngai. Presbyterian kohhran Thurin No. 5-naah Pathianin a fapa Lal Isua Krista
hmangin chhandamna a rawn siam ta a ni tih thurin nghet tak kan nei. Rorelna dik
lo, politics kal sual, mipui nun tlu chhia, hlemhletna leh khawvel thila
intlansiakna, duhamnate; heng zawng zawng lak atangin Pathianin min chhandam tel
vek a ni tih hi kan hre ta lo emaw ni chu aw, tih turin rawngbawltute pawh hi
kan awm chang a awm ta fo mai. Sual huatna leh pawi tih lohna kan tlachham a,
sual avanga lungngaihna leh thawpiknate hi ringtuten kan neih tawk loh avang te
pawh hian sual hi a ngampa ta emaw tih mai te a awl thin. Kan ram leh hnamah
sualna chi hrang hrang a pun leh a nasat em avanga thawpika rûm thin
rawngbawltu/ringtu engzât tak awm ang maw? Zawlneite hunlai pawhin Jerusalem-ah
inpawng nekna leh sualna chi hrang hrang nen, Pathian duh loh zawngin an khawsa
nasa hle a ni. Zawlnei Ezekiela lehkhabu 9:4-ah “Khawpui chu fang la,Jerusalem
chu fang chhuak rawh: achhunga thil tenawm tih tawhte avanga thawpika tap thinte
chu an chalah chhinchhiah ang che.” tiin Lalpa’n a sawi. Chala chhinchhiahna nei
lote chan chu a rapthlak hle mai. Hetah tak hian ringtute mawhphurhna a sâng hle
a ni. Thih hnu piah lam mai ni lo, he leia kan dam chhung ngei pawhin duhamna,
hlemhletna, chapona leh sualna chi hrang hrang lakah Pathianin min chhandam tih
i hre thar leh ang u. Amen!
No comments:
Post a Comment