KUM THARAH - KUM PUAN

KUM THARAH - KUM PUAN

He kum thar hi Isua nena
inlaichinna neih kumah lo puang ve
phawt mai teh, mi rualin i inkhawm \hin
a, mi zai rualin i zai \hin a, mi thawhlawm
thawh rualin i thawh a, a mala i awm
hian Isua nena in inlaichinna a fel ngei
tih i chiang em? Khawvelah hian Isua
mamawh tih inhre si lo, Isua nena
inlaichinna nghet neih loh vanga
beidawng, lungngai, mahni nunna hial
la an va tam ta em!

Korean zai thiam, hlaphuah
thiam leh ziak mi, Jonghyun-a chu kum
27 mi lek niin December ni 12 khan a
intihlum a, amah hi mi lar leh ngaihsan
hlawh tak Pop Group Shinee-a mi a ni.
A thih hmalawk paw’n an la Concert a,
a hnulawka thil thleng hian mi a
barakhaih a, amah ngaisangtu ten an
hrethiam thei lo a ni. BBC chuan a
intihhlum chhan nia a sawi chu
“depression” a ni. A thu ziak
hnutchhiah-ah chuan fel lo a intih thu te,
mi \henkhat tana hnawksak nia a inhriat
thu te, a nun rim lutuk hahdam taka a
chantir thiam loh thu te a ziak a ni.
He mi lar hian Isua nena
inlaichinna dik chhar hman hlauh se
zawng - a fel lohna chu Krista-ah chin
fel niin, a nun hahdam nan Isua
nghawngkawl a bat hlauh tur hi a nia le!
Kan taksa hi ruanga a chan
hunah pawh, Isua nena kan nun a
inzawm avangin kan thi dawn lo va,
chatuan atan kan nung tawh zawk dawn
a ni. Mi lar leh hausa, khawvelin a
ngaihsan nimahse Isua nena inlaichinna
dik an neih loh chuan an tawpna chu a
rapthlak thei hle tho mai; Isua nei lotu
nih hi a va rapthlak em!
A pahnihna-ah chuan he kum
thar hi lungawi kumah puang veleh rawih
mai teh ang, mahni chan tawk a lawm
thiam te hi mi vannei an ni. Thil reng
reng ngaia neih hi a awl viau mai a.
Tuna i dinhmunah khan ilungawi lo viau
a ni thei e, nimahsela mi tam takin an
awh ngawih ngawih i ni tih i ngaihtuah
ngai em? Tun hma kha chuan tuna i
dinhmun hi i duhthusam, i suangtuah
a nih \hin kha; mihring duh hian chin
lem a nei lo, i neih chhiar la, lawmna
tur tam tak i hmu ang.
Pathianah mi a lawm tlat
chuan a biak Pathian a lungawi a,
malsawmna a pek belh nge nge \hin,
kan fate pawh an lawm thiam viau
chuan pek belh kan chak ang tho hi a
ni. Nu leh pa laka dawn tur ang dawng
lova inhria, vui reng maite hi thil tihsak
an phurawm loh. “Lalpaa lawmna in
duh chuan, A rohlu chhiar rawh u”
(KHB No. 37) tih a ni ve bawk.
Eizawnnain hniam lam a pan a, hriselna
a lo pan a, vanduaina leh hmuingil lohna
chi hrang hrangin nun a tuam vel a,
chutih mek laia, a biak Pathian laka a
lungawi a, a lawm tlat chuan sualin a
khawih thei lo. Lawm tlat hi chak rengna
a ni. “Lalpa chunga lawmna chu in
chakna a ni si a” (Nehemia 8:10b).
A tawp berah chuan thawhrim
kumah puang teh ang. Hna tam tak chu
kan thawhrim avanga a hlawkna kan
tel tur a awmlaiin heng sawrkar hna
angahte hi chuan kan thawhrim paw’n
kan hlawh a pangngai a, ‘dam chhung
pawn kan thawk zo dawn chuang
hleinem’ tih \awngkam a lo chhuak ta
hial a ni. A nihna takah chuan dam
chhung pawha kan thawh zawh dawn
loh avang taka thawh nasat ngai a ni
zawk. Sap \awngah chuan “what goes
around comes around” an ti a, kan
thiltih vek hi keimahniah a lo let leh
\1hin. Kan pute emaw, kan kohhran
hruaitute emaw hian kan
\hahnemngaihna hi an hre kher lem lo
a ni thei e, lo hmurengtu leh lo
chhiahchhiah kiautu a awm, mahni
thawhrim rah chu mahningeiin kan seng
\hin. “Thawhrimna zawng zawngah
hian hlawkna a awm a” (Thuf. 14:23).